BAI EUSKARARI GIDA

Kontsulta ezazu Malerrekako Bai Euskarari ziurtagiria dutenen gida.

 

BAI EUSKARARI

40 erakundek (saltoki, enpresa eta elkarteak) jaso dute Bai Euskarari Ziurtagiria Malerrekan.

2009an hasi zen lanari jarraipena emateko joan den azaroaren 25ean Bai Euskarari Ziurtagiriaren bigarren banaketa ekitaldia egin zen Malerrekako Mankomunitatearen egoitzan, Donezteben. Beheitiko argazkian ageri direnak ziurtagiria eskuratu duten Malerrekako saltoki, enpresa eta elkarteetako ordezkariak dira. Ekitaldi honen bidez Malerrekako Euskara Batzordeak ziurtagiridunek egindako ahalegina eskertu eta saritu nahi izan du.

Aurreko urteetan egindako lanari jarraipena emanez Kristina Urrutia leitzarrak 2010ean ziurtagiria eskuratu zuten Malerrekako establezimendu guztiak bisitatu ditu, hartutako konpromisoen betetze maila aztertzeko eta erakunde horiek konpromiso berriak hartu ditzaten bulkatzeko. Bisitak egin eta gero 40 saltoki, enpresa eta elkartek baietza eman diote Bai Euskarari Ziurtagiriari. Guzti horiei esker ona adierazteko eta beren ahalegina saritzeko aukera izan genuen azaroaren 25ean ospatu zen ekitaldian.

Honekin batera Ziurtagiriaren helburuak gogoratu nahiko genituzke:

Lan mundua euskalduntzera bideratutako egitasmoa dugu hau; gure eguneroko erosketak, negozioak edo bertzelako lan kontuak euskaraz egiteko aukera eskaintzen du ziurtagiriak. Horregatik enpresa, saltoki eta elkarteei ziurtagiria eskaintzen zaie. Horrela, ziurtagiriarekin bat egiten duten erakundek euskararen aldeko konpromisoa eta hizkuntza normalizazioaren aldeko apustua egiten dutela erakusten dute, horrela bere establezimendua poliki-poliki euskalduntzen joateko.

Horrela establezimendu bakoitzak bere erritmoa jarraituko du, establezimendu bakoitzaren errealitatea desberdina delako. Bakoitzaren abiapuntua desberdina izanen da baina guztiak helburu berarekin eginen dute lan: euskararen egoeran aurrerapausoak ematea.

Ziurtagiria duen denda, enpresa edo elkarte bakoitzaren atean edo barnean Bai Euskarari logotipoa aurkituko duzue, laranja-beltz kolorearekin. Logotipoak adieraziko dizue toki horretan zerbitzua euskaraz emanen dizuetela, eta euskaraz hitzeko gai ez badira, euskararen aldeko konpromiso zenbait hartu dituztela.

Lehen erran dugun gisan establezimendu horiek hartu duten erabakia eta bere ahalegina eskertu beharrekoak dira, baina horrek ez luke inolako zentzurik izanen Malerrekako herritarrok aukera hori probesten ez badugu.

Beraz, hemendik deia egiten dugu aukera probesteko, erosketak euskaraz egin ahal izateko, lantokian euskaraz egiteko… laburbilduz, eta ahal dugun neurrian euskaraz bizitzeko.

Bai Euskarari ziurtagiria dutenen taldeko argazkia