Mancomunidad de Malerreka

Hizkuntza errealitatearen berri emateko turismo-eskuorri berria

Bortziriak, Malerreka eta Baztango euskara zerbitzuek eskualde hauetako hizkuntza errealitatearen berri emateko eskuorria argitaratu dute.

Bi formatutan kaleratu dute eskuorria: paperean eta pdf interaktibo gisa. Hiru eskualdeetako turismo bulego eta leku turistiko garrantzitsuenetan eskuratu ahal izanen da, baita euskara zerbitzu eta udalen bidez ere.

Argitalpenak Baztan, Bortziriak eta Malerrekako hizkuntza errealitatearen berri ematen duen azalpentxo bat dakar euskaraz, gazteleraz, frantsesez, katalanez eta ingelesez. Azalpen horretan azpimarratzen da eskualde hauetan euskara hizkuntza bizia dela, eta horrez gain bisitariei ahal duten neurrian euskara erabiltzeko gonbita egiten zaie. Horretarako oinarrizko hiztegi bat erantsi da, gaztelera, frantsesa, katalana eta ingelesera itzulia. Horrekin batera QR kode bat agertzen da, eta lotura horren bitartez euskarako hiztegia hizkuntza gehiagotara itzulia aurki daiteke (eta alderantziz). Gainera, berrikuntza modura PDF interaktiboa ere prestatu dute, argitalpena edozein gailutan modu errazean deskargatu eta erabiltzeko moduan.

Eskualde horietako promozio turistikoa lantzen delarik, bertako paisaia, baliabideak, kultura, ohiturak eta tokiak kontuan hartzen dira, baina ez da berdin jokatzen hizkuntzarekin; eta euskara ere bada Baztan, Malerreka eta Bortzirien marka. Hortaz, gabezia horri aurre egin nahian prestatu dute argitalpena.